【隨想】 香樹森林動物寓言

依家gei時事，真係忍唔住要寫返出黎笑下。

係從前唔係好耐的廿幾三十幾年前，過百年來獅子管理住呢片香樹森林。由過每次辦事的判決同經驗，紀錄成「普通約章」去依法辦事，係獅子成長過程中摸索到的管理手法。有一日，狗狗大臣係處理森林的土地問題時候，題下佢：「嗯...照似前d合約咁呢...森林北部嗰片土地，之前係臨時係北面老虎借黎，依家我地d香豬一早習慣成個香樹森林係一體gei,  佢地住緊的地方到期之後點算呀？」當時狗狗仲係行緊精英制，唔似依家出名為五斗米擺擺尾，做做show。

獅子：「洗唔洗同嗰隻老虎傾傾佢呢？好，大家傾下之後點算。」

呢個時候的老虎坐上北面大陸的王位不過幾十年，百廢待興。佢嗰套統治手法都係依法辦事，但法規由我寫成，最緊要都係「我話事」。之前有時自己爪痕，搞廢左大片土地，有時又搞殘左d小動物，又要再摸索試過，大家跌跌碰碰咁發展，未有心力管理呢片繁榮的香樹森林，所以仲點同你商量點做咩？老虎的口風好簡單：「It's all mine！到時我全都要！」。最後結果就係約定香樹森林嗰場13年後交俾老虎。但點run落去？跟獅子嗰套啦！大家放心，將來一個虎口之下有兩種制度(吼~)，香樹森林將會獅規虎循，50年不變，香樹森林由香森動物治理。雙方出份虎獅聯合聲明，立張字據係聯合動物世界。

同埋係過渡時候，老虎派老狐狸黎香森開個「通訊社－香森分社」，呢個類通訊社老虎領地內外都有。 嗯...重點黎啦，通訊可以是一個有趣的功能，香森分社的老狐狸呢方面好識玩。  今日重點係想講狐狸一族。時移世易，老狐狸的「通訊社－香森分社」流傳落去變身「老虎政府駐香森聯絡辦公室」，仲有「香森事務辦公室」等狐狸崽。從前到現在，大家都是狐，狐假虎威、為作虎倀的狐，沒怎麼分別嘛。

係獅子管理下，老狐狸當然不敢造次。但到交接終於發生左之後，雖然話香森動物高度自治，但有時老虎知道唔方便出面講既，就搵借狐狸崽把口講幾句……有時狐狸崽又鍾意自己衝出黎講下野，有句成語叫狐假虎威……總之，狐狸開口，班管治階層的狗狗 Puppy，就會頭耷耷、搖搖尾、聽話、Good Dog。所以某程度狐狸崽真係可以係香森做到舞高弄低。今時今日的狗狗 到底為虎作倀，定係 為狐作倀？是旦啦，係香豬受害的角度咪一樣。

只係今日，狐狸崽又黎口多多:「邊隻豬豬唔聽話，狗狗應該要 D左佢！Q左佢！炒左佢！」。其實狗狗習慣賣豬仔ga la ，而狐崽野心，一早豬豬皆知。不過狐狸崽實質無權，無咩既，亂叫下啫。.... 

作為維護香森動物權益的香豬當然要笑下佢地啦：「多管閒事，香森事務唔到狐狸佢亂叫喎。」「根據香森基本法22條，中央政府所屬各部門，......，均不得干預香森自行管理的事務。...... 甚至如需在香森設立機構，須徵得香森政府同意喎....」狐狸的角色一向都係「講野」(吹水)：「我地唔係22條所指一般意義的中央所屬部門」。狐狸心裡自己代表老虎，老虎就係話晒事，我地係香森的做法就係「我話事」！

另一方面，見“主子”俾話的狗狗就急了，只有繼續用佢最慣用嗰套花式－謊言藝術：「狐狸是22條第2款所設立的3個機構之一，代表老虎，理所當然提出意見！」

Shit！狐狸話唔係22條？OK，改返先：「狐狸代表老虎，理所當然提出意見！」

Shit Shit！俾豬豬捉到我咁柒改口tim，兜返先:「狐狸一早設立係度代表老虎，不是22條第2款所指，@!?#*^......」 唔睇下22條第一款gei...？都話呢招叫謊言藝術。

Shit Shit Shit！邊隻狗狗咁死蠢，講多錯多，呢鋪真係要炒左佢，重新整頓狗狗隊型。

所以各位小豬豬要知道，講大話係唔啱ga。用大話掩飾大話係遲早會穿崩，醜死怪的。

唉....其實狐狸多管閒事多年黎都係問題火頭。狗狗錯在心態同做法，亂咁周圍撲火，搞到重組隊型係柒。但大家本質不變，接下來的遊戲模式咪又係咁。如果為虎的選擇作倀，如果狐繼續假借虎威，如果香森的當權狗狗繼續只識討好外面的權貴。大家認為香森「主人」係邊個……香豬除了嘲笑之外，其實應該做咩？一直以來我係覺得學到的教訓和下一步方向才是港人將來的重點，有機會再寫。你又點睇?

* 各動物只係顯然的借喻，可惜現實有時人比動物荒誕。

～條文～

香港基本法第22條：

「中央人民政府所屬各部門、各省、自治區、直轄市均不得干預香港特別行政區根據本法自行管理的事務。

中央各部門、各省、自治區、直轄市如需在香港特別行政區設立機構，須徵得香港特別行政區政府同意並經中央人民政府批准。

中央各部門、各省、自治區、直轄市在香港特別行政區設立的一切機構及其人員均須遵守香港特別行政區的法律。

中國其他地區的人進入香港特別行政區須辦理批准手續，其中進入香港特別行政區定居的人數由中央人民政府主管部門徵求香港特別行政區政府的意見後確定。

香港特別行政區可在北京設立辦事機構。」